Hainbat urteko ibilbidea egin du Irulegiko proiektu arkeologikoak (Aranguren, Nafarroa), Aranzadi Zientzia Elkartearen eta erakunde publikoen elkarlanari esker. Berriki aurkeztu dute aztarnategiak eman duen azken sorpresa, Nafarroako Gobernuak egindako agerraldian: esku-itxurako brontzezko xafla bat eta, bertan inskribatuta, orain arteko euskal testu zaharrena izan litekeena, K.a I. mendekoa. Baskoiek duela 2.100 urte idazten zutela frogatzen duen altxorra da, gure hizkuntzara moldatutako aldaera batean gainera.